साहित्यकार रोमन अधिकारीको बहुप्रतीक्षित नयाँ कथा सङ्ग्रह “अमेरिका सपना” आगामी अगस्ट १, २०२६ मा विमोचन हुने भएको छ। नेपालको प्रतिष्ठित प्रकाशन गृह भूँडीपुराण प्रकाशन, काठमाडौँ द्वारा बजारमा ल्याउन लागिएको यस कृतिको विमोचन समारोह न्यूयोर्कको वुडसाइडस्थित ‘काठमाडौँ फ्युजन किचन’ (39-26 61st Street, Woodside NY 11377) मा भव्य रूपमा आयोजना गरिँदै छ।
पुस्तक विमोचनको यसै अन्तिम तयारीका बीच लेखक अधिकारीले लोकप्रिय मिडिया ‘GNN TALK’ पोडकास्टमा विशेष कुराकानी गर्दै आफ्नो नयाँ कृतिबारे धेरै रोचक पाटाहरू खुलासा गरेका छन्। GNN TALK का प्रस्तोता दीपर्शन प्रसाईंसँग गरिएको उक्त छोटो तर गहन संवादमा साहित्यकार अधिकारीले “अमेरिका सपना” भित्र समेटिएका कथाहरूको मुख्य विषयवस्तु, लेखन यात्राका भोगाइ र कथाको अन्तर्यबारे प्रस्ट पारेका छन्।
विशेषगरी नेपाली समाजमा जरो गाडेर रहेको ‘अमेरिका मोह’, आप्रवासी नेपालीका संघर्ष, त्यसका बहुआयामिक पाटा र मानवीय संवेदनालाई कथामार्फत दुरुस्तै उतार्ने प्रयास गरिएको लेखक अधिकारीले बताए।
पुस्तक विमोचनको पूर्वसन्ध्यामा प्रस्तोता दीपर्शन प्रसाईंसँग गरिएको यो विशेष कुराकानी सार्वजनिक भएसँगै पाठकहरूमाझ थप कौतुहलता र उत्साह जगाएको छ। भूँडीपुराण प्रकाशनले प्रकाशन गरेको यो कथा सङ्ग्रहले नेपाली आख्यान जगतमा एक नयाँ र जीवन्त बहस सिर्जना गर्ने अपेक्षा गरिएको छ।
